Awig Bugbug 1: Aran lan Wawidangan Desa

MURDHA CITTA

OM Awighnamastu nama siddham.

Sangkaning asung kertha wara nugraha Ida Sanghyang Parama Kawi, makaputusing paseban Krama Desa Adat Bugbug saha umenget ring sukertaning Sang mawisesa ring rat, prasida kasidan gumawe Awig-Awig Desa Pakraman maka sipat siku-siku pameneh. Lamakana wastu sidhaning don prayojanan mami kabeh sahananing pawongannya prasama angidepakena kadi linging Awig-Awig iki.

SARGA I

ARAN LAN WAWIDANGAN DESA

Pawos I

1.     Desa Pakraman puniki mawasta Desa Adat Bugbug.

2.     Jebar kakuwub wawidangannya mawates nyatur utawi ngider bhuwana, luire: a. Sisi wetan ring Banyu Biru utawi Er Bru (saking Batu Kowek utawi Ngampan Rempak kantos ke Apen Bias Putih).  n. Sisi kidul ring Ampwaning Segara (saking Apen kantos ka Batu Madeg). c. Sisi kulon ring Cima (saking Batu Madeg kantos ka Sema ). r. Sisi lor ring Ngampan Rempak (saking Sema kantos ka Batu Kowek).

Pawos 2

Kakuwub wawidangan Desane manut dresta luire:

1.     Papupulan karang paumahan sinanggah palemahan Desa Pakraman.

2.   Setra, bangket miwah tegal ring kakuwub wawidangan Desane sejawaning palemahan Desa Pakraman manggeh telajakan Desa.

Pawos 3

Sahanan awig-awig, pararem-pararem miwah sahanan pasuaran Desane manggeh kajejeran ring kakuwub wawidangan Desa Adat Bugbug.

Pawos 4

1.   Desa Adat Bugbug puniki kawangun antuk papupulan karang ayahan Desa, turmaning kapalih dados solas Banjar Adat, liure: a. Banjar Puseh, n. Banjar Bancingah,  c. Banjar Madya,  r. Banjar Darmalaksana, k.Banjar Segaa, d. Banjar Celuk Kangin,  t. Banjar Celuk Kauh,      s. Banjar Dukuh Tengah, w. Banjar Baruna, l. Banjar Garia,    m.  Banjar Samuh.

2.     Manut ring nunjuk-lungsuring cacah jiwan pawongannya, pah-pahan Banjare rauhing wates wawidangan palemahannya manut pamutus paparuman Desane,

Pawos 5

1.     Banjare wenang ngardi awig-awig miwah pararem-pararem maka pamikukuhnya.

2.     Awig-awig miwah pararem-pararem Banjare tan wenang lempas ring Awig-Awig miwah pararem-pararem Desane, saha taher kalingga-tanganin antuk Jero Bandesa miwah Kelihan Desa maka pamikukuhnya dumugi dados lumaksana.

3.     Banjare patut madruwe piranti-piranti, pamekasnya Bale Banjar miwah kulkul.

4.     Banjare patut madruwe tempekan "Daha-Taruna" manut pamutus paparuman.

INDEKS:

Murdha Citta, Aran lan Wawidangan Desa,  Patitis lan Pamikukuh, Sukerta Tata Pakraman, Sukerta Tata Agama, Sukerta Tata Pawongan,  Wicara lan Pamidanda, Nguwah-Nguwuhin Awig-Awig.